كرهبتي،نسيبتي و اسرائيل

نهارتها واتاتني قضية وسط البلاد.قلت لنسيبتي شدلي الطفل ساعتين مالزمن و هاني راجع.قاتلي ما تبطاشي خاطر عندي موعد بعد ثلاث سوايع.انا الماني في اوقاتي،قيضيت شوري ورجعت عالكرهبة .وسط البلاد معبي بالكراهب وانا نسيبتي تطلب و تعاود خاطر وقيت باش تمشي للموعد متاعها.دور منا دور منا شي شطر الانهج مسكره.اش نعمل اش نساوي يا جماعة مخي مقلوب كيما يقول السملالي.ساعة و نص وانا في البوشون.انا هكاكه و الكرهبة عملت سنيال ستوب ثبت في السخانة نلقى الكرهبة باش تشعل.ربع ساعة اخرى باش لقيت وين انقاري.حليت الكبوط عجاجة دخان.بقيت ساعتين باش بردت شوية .كلمت ننسيبتي لقاها في حالة ناقص كان تسبني.صبيت شوية ماء في الكرهبة و ديماريت .ربع ساعة و السخانة طلعت من جديد.قاريت الكرهبة و سكرتها و قلت ما يوصلني كان المترو.في المحطة الي بحذا الدار ريت ورقة في القاعة ،خذيتها قريتها و فهمت الي صارلي الكل.الورقة هي منشور متاع جمعية مساندة لفلسطين تدعو الناس للتظاهر قدام الملعب الي باش يحتضن ليلتها ماتش فوت بين فريق لمدينة هاذي و فريق اسرائيلي.هذاكه علاش الانهج مسكره و هذاكه علاش سخنت كرهتي

نورمال

عندما يستوي كل شئ.لا قيمة للكلمات لا قيمة للشعارات لا قيمة للمبادئ و نورمال ديما يمشي.لا اخلاق لا اتكلم بمنطق ديني لا مبدا.المبداالوحيد سلك روحك ,ارخف جنبك تتعلم العوم.سمعنا هذه الكلمات راكثر من من عشرين سنة و النتيجة مغني تونسي يهتف براس صهيوني وديما يمشي 100 الف اورو في الجيب ولابس و الشعب يحب اللعب وتونسي و راسي عالي ملا حالة ومالا كارثة.

بابا علاش الي يراك يخاف منك

هاذي جملة قالها مراهق في عيد ميلادو17 لبوه كيف لاحظ الخوف على وليد صغير حاول بوه يلعب معاه

احلى رب :رب عمر ابن الخطاب

احلى رب في العالم هو رب عمر ابن الخطاب.رب صنعو عمر(قبل ما يستسلم) من التمر في شكل تمثال صغير وكيف جاع ابن الخطاب كلى ربو.ومن غادي يظهرلي جات عبارة"ما احلى ربو" الي نقولوها باش نعبرو على حاجة حلوة برشة كيفما بونتو باهي والا كتاب باهي والى بيزو باهي..

قعدة برتغالية

البارح 29 جوان 2010 البرتغال و السبنيور لعبو الويتيام دو فينال متاع الكوب دو موند.انا خوكم نحب نعيش الحدث كوم الفو.اش عملت؟عملت دوش واقصدت ربي لبار متاع بورتغاليين.ايا قعدت وطلبت كعبة باردة برتغالية جاية من بورتو"PORTO".البار فاضي كيف سالت قالولي راهم برشة يحبو يتفرجو في ديارهم باش يبعدو عالتنرفيز.تبعت شوية التلفزة نلقاهم حاطين الشان متاع البرتغال واشكون متصدر فيها؟؟؟الكلب بني الكلب الي كان موش من فكرتو المزمرة راني توه نتفرج في تونس في الكوب دو موند.كويلو المدرب السابق متاعنا يحكي و يحلل قبل ما يبدى الطرح.سالت واحد بجنبي قتلو فاش يقول كويلو؟قالي راه ينبه ويقول لازم ناخذو حذرنا مالسبنيور راهم صعاب.ضحكت وقتلو كلامو هو هو ,حتى كونتر الموزنبيق قالنا خوذو حذركم راهم المزانبقة صعاب,او في جرة كلامو قعدنا خايفين لين تنحينا من كاس العالم.ايا زدت وحيدة باردة اخرى لين بدى الماتش وبداو الجماعة يسبو في الفيفا قالك كيفاش يحطو ارجنتيني حكم ياخي ماهو باش يعاون السبنيور خاطرهم فرد لوغة.ايا وفى الميتون لول تعادل اما البرتغاليين يسبو في كريستيانو رونالدو,قالو ما يعمل في شي وقاعد يتبولد,حتى النشيد الرسمي متاعهم ما غناهوش عكس الملاعبية الاخرين الكل.الميتون الثاني لعباد تحمسو اكثر لكن هدف السبنيور صب عليهم سطل ماء.سكتو وبداو يتبعو ويعسو عالوقت حتى لين وفى الطرح بعد ما عطى الحكم ورقة حمرا لملاعبي برتغالي.وقفو الكل يسبو ويلعنو اما ثمة واحد مالاول قاعد وحدو ما قال شي وكيف وفى الطرح قلب كاسو و عيط باعلى صوت وهو واقف وايديه الفوق :اه اه اه, عاودها ثلاثة مرات واخرج.انا زاده كملت كعبتي وخرجت للشارع على صوت الكلاكسونات والعياط متاع السبنيور الي خرجو يحتفلو بربحهم.

سعدية السلفية

من غير ما نقصد نلقى روحي نشوف في ليست لاصحاب متاع واحدة متحجبة في الفايس بوك. شد عندك سعدية السلفية,مسلمة,ام محمد, ام عبد الله, ام...........امة الله,امة الاسلام, اسمى حيجابيست,دنيا جلباب,يسرى نقاب....الحصيلو لا واحدة حاطة اسمها و الاحلى من هذا تصاور البروفيل متاعهم .نخليكم تشوفو و تحكمو وحدكم ( ملاحظة غيرت الاسماء نسبيا حتى لا نقع في التشهير او ان نتسبب في اي ازعاج للانسات و السيدات)

الكمية حديث

قبل كيف نتلمو باش نعملو كعبات و بعد ما نشريو البيرات مالدبو و نبداو مروحين للدار كان صحيبي يقول:اشنوه الكمية حديث اليوم ؟نضحكو ومن بعد نشريو كمية خفيفة ماركه شويه لوز او بيستاش مالحماص.اليوم وحدي البيرة بنزي الكمية على كل لون يا كريمة اما ناقصة حاجة وحده وهي اهم حاجة في القعده, ناقصة الحديث ,خاطرني وحدي .

محجوب العياري : يجب ان تكسر الاشياء الوضيعة لتاتي الاشياء القيمة

محجوب العياري : يجب ان تكسر الاشياء الوضيعة لتاتي الاشياء القيمة

الاول من افريل يواجهني خبر موت محجوب العياري على صفحات جريدة لابريس عندما كنت على متن طائرة اغادر تونس عائدا الى اوربا.تذكرته ذات صيف في حانة الريتونده بكورنيش مدينة نابل.سمعته يقول يومها بعدما سقطت قارورة خمره و تهشمت و اهدى له حريف قارورة خمر اجود من الاولى،يجب ان تكسر الاشياء الوضيعة لتاتي الاشياء القيمة.كم كانت عظيمة جملتك يا محجوب و كم كسرت بعد سماعها من اشياء وضيعة

عمار : جدارك العازل يطوقك ولا يطوقني

متى ستعرف يا عمار اني ادون بقلم و ليس برشاش .متى ستعرف يا عمار اني مدون و لست انتحاريا.متى ستعرف يا عماران المعابر التي تغلقها امامي لا تحميك لاني لا احمل حزاما ناسفا.متى ستعرف يا عماران جدارك العازل يطوقك ولا يطوقني.